بوح

سنة من الأنتظار.. سنة من ولا شي
سنة بحاول بعد عن كل شي بس هالكل شي هو حياتي..
الاخبار الي قرفنا سماعا او حتى توقع اي شي .. لانو منعرف انو كلو كذب بكذب ..وبس بفرجونا وبخلونا نسمع الي هنن حايين يفرجونا ياه ويسمعونا ياه..

الحقيقي انو في ناس عم تموت ..انو في ناس عم تتوجع .. وانو هدول ابسط نموذجين... لانو الي مات الامل بقلبون وجعون اكبر.. والي ماتت الرحمة بقلوبون تشوهون أكبر
الي صار بسوريا وعم يصير ورح يصير كتير كبير.. كتير بوجع ...وكتير رح يغير من الكون... ع قد مو الكلمة كبيرة قصدي عن الكون ع قد مو حاسستا حقيقة..
اشتقت لحالي.. اشتقت للاشيا السخيفة..

هلا كل شي اختلف..

ولا شي منسجم جواتي.. ع قد مو واهمة حالي انو عم امشي صح ع قد مو حاسة بالضياع.. واحساسي انو كتير سوريين متلي .. تخطينا مرحلة التعب وصرنا بمكان تاني لهلا ما عم اعرف وصفو ..

اوقات بفكر معقولة دانتي بالكوميديا الإلهية  مرق بشي بيشبه الي عم نمر فيه!!

 معقولة طلعنا من الجحيم ونحنا هلا بالبرزخ قبل ما نوصل عالفردوس!!!
الطريق بشع وصعب وطويل... الطريق مؤلم.. الحلو فيه الناس الي حولينا وبيمسكو بايدنا.. ع قد مافي ناس بهالطريق كانو هنن مصدر الألم ع قد مافي ناس كانت بلسم لكتير أوجاع ...
الحمد لله على كل شي.. ع الوجع قبل اي شي .. ع كل الاشياء الي ما عم افهما وبتعبني.. بعرف انو كل شي كل شي عم يصير بحكمة وبتدبير وانو في خالق بيحسب حتى النفس.. وانو هو حاسس فينا بكل همسة وبكل حركة.. وانو هو حولينا بكل تفصيلة.. انو هو عم يرسم لوحة الكون متل مو لازم تكون.. هو المصور والوحيد الي بيقدر يشوف اللوحة كاملة ونحنا قد ماحاولنا.. فينا شي ناقص .

وبنفس الوقت جوا كل واحد فينا فيه ضو او شعلة منو .. من هالضو وقت بيكون عتمة كتير هو بيضوي الامل فينا.. هادا بسميه الايمان الي مخلينا لهلا اقوى...
كتير حكيت وحابة ما اسكت.. بس بكفي..  الي وصل للاخير شكرا.. هلكتكون معي